Sunday, December 05, 2010

رسائل قصيرة

رسائل قصيرة...لناس كتير يهموني...بس رسائل ....إتحبست..في وقت كان ممكن تتقال فيه

أول رسالة...

أنا بحبك أوي عشان إنت ربتني...عشان إنت بابا...بس أكيد كان ممكن ارتبط بيك لأكتر من السبب الأساسي إلي هو انك بابا...إنت بتمثلي حاجة ...بس أنا بردو مش عارفة هي إيه...مش فاهماها أبداً..


ثاني رسالة..

انتي بتحاولي تعوضيني..أنا عارفة.....بس ممكن يكون دا شيء أجمل لو كان جه بدري شوية؟ بس بردو لازم أقولك شكراً على حاجات كتير..


٣ --

أنا تعبت..انتي محتاجة مني حاجات كتير...وانا مش قادرة أديكي أي حاجة...وانتي مش عايزة تدي لنفسك حاجة.....معندكيش إستعداد..


4..

إنت أناني أوي .... عايز كل حاجة مني زي مانت متوقع بالظبط و لو مقدرتش أبقى قد التوقعات دي....أتحاسب بقسوة بس عمرك ما سألت نفسك إنت فين من توقعاتي...و هي أصلاً مش توقعات...دي بديهيات..؟! إنت فين منها !؟ إنت بتحب نفسك بس.. و بتحب إلي حواليك من خلال حبهم ليك...بتحبهم عشان طالعين بيك السما...لكن صوت العقل عندك ...إتخرس...لأنك مش هتسمعني بنصحك تاني لما هتيجي جري عشان تحتاجها..


٥-

عارفة انك كنت بتكلمني لما تكون واقع في مصيبة بس...أو عندك مشكلة كبيرة...أو عايزني أقول الكلام إنت عارفه بس بصوت عالي ....بس أنا حتى لما مكانش بيبقى عندي مصيبة...عمري ما عرفت أوصلك...
و على فكرة...اتعودت...و مابقتش عايزة أوصلك... ولا عايزة أسمعلك.. مع اني بحبك أوي ....بس أنا مش مجرد الصوت العالي لأفكارك... أنا إحساس و عايزة بردو صوت عالي لأفكاري...



٦ - انتي مرايتي ...مختلفين في إسلوب الحياه...لكن انتي أنا و أنا انتي ..... و صعب الحياة من غير حد زيك في حياتي...مش بعرف اتخيلها..انتي بتفهميني وانا ساكتة أكتر من لما بتكلم...و حتى و أنا بكتبلك د...اتصلتي حالاً!!


٧ - إنت انسان حقيقي قوي ،،،مش بتحاول تبقى أي حاجة مش فيك....طبيعي و بتتقبل الناس على طبعهم...و نفسيتك جميلة... مش بتعرف تجرح حد...مش بتعرف لأنك كمان مش عايز توصل لده ..و حتى لو جرحت حد بتبقى حنين...و احساسك و طيبتك معايا أثروا فيا كتير أوي..و لاقيت فيك صديق ... في وقت مكنتش لاقية فيه
أي حد...


٨-- باموت في جنانك و طرقعتك و مودك المشقلب ... و قراراتك إلي بتغيريها. كل دقيقة...بتعصبيني لأنك بتعملي حاجات عبيطة... وانتي مش غبية ..بس انتي عملة زي النسمة الجميلة إلي مش ممكن تيجي تعدي على حد..إلا لما يقول الله على نسمة الهوى الجميلة دي؟ ابتسامتك بتخلي قلبي يضحك..! إلسفر معاكي ...هو إلي بيدي معنى للسفر...





٩ - انتي كمان أمي...مش ماما بس...!


١٠ - إنت صديقي و ابني و أخويا ..عايزة أخدك في حضني علطول...بحس اني مسؤولة عنك.. و بردو بتعلم منك حاجات كتير أوي..وجودك فالدنيا بس هو هدية من ربنا ...هافضل أحبها طول عمري .. هدية عمرها ما هتفقد معناها...بحبك لما تتعصب مني عليا لأنك بتحبني و بحبك قوي عشان بتقولي ...(مايهمكيش) من أي حد...! و بحبك أكتر عشان عارفة إن إنت مش هاتسبني لأننا عائلة ...حتى لو مش فعلاً عائلة ..

عاقل أوي حتى وانت مجنون...!


١١ - عارفة قوي اني مقصرة معاك بس بحس انك محتاج طاقة معينة مش موجودة عندي زي زمان....أنا أصلاً مابقتش زي زمان....و إنت بعدت فترة عن حياتي ..و لما رجعت... احتجتني أكتر من الاول ...بس أنا كنت اتغيرت ....و لما حاولت أكون موجودة...عشان أساعدك....إنت رفضت.........عادي ده حقك.... بس أنا كمان محتاجة انتبه لنفسي و أحب نفسي أكتر ...إنت مش عارف يوم وحد ممكن يعمل ا إيه فالانسان...!


١٢ - انت إختراع ملوش حل. صدقت انه موجود...لأن مفيش غير نسخة واحدة منه ....إللي هو .. أنا!! أنا صدقت نفسي أكتر ...لما لقيتك..!!! لأ د أنا مؤمنة دلوقتي بالإستنساخ المعنوي.. والفكري...أنا تقريباً كلامي و احساسي بياخد اشارته من مخك إنت...!



١٤-- وحشتيني أوي... يا ريتك تاني تيجي يوم واحد بس.. ...تزعقيلي عشان مرضتش اتغدى الأكل إلي تعبتي فيه عشان فرحانة اني جايالك ...ياريتني قدرت ده ... و أكلت كل الأكل حتى لو كنت مش عايزة ..


١٥- العيد من غيرك ...ديماً ناقصه عيد..!


كنت دايماً مستنياك تتكلم على حاجة غير إلأكل والشرب... مكنتش بستحملك و إنت مبهدل و مش مهتم بنفسك... إلكركبة إلي من برى د .. معناها في كركبة فظيعة جواك...عمرك ما قدرت ترتب غير تربيزة إلسفرة عندك فالبيت...

انتي توأم روحي.. روحك روحي...و احساسي معاكي بكل حاجة..كأنه مقسوم نصين.. حتى الهزار هو هو...انتي مش معقولة...

- رسالة لنفسي ...

أنا ساعات بجري ...في وقت محدش هيحس إن كان لازم أجري فيه... بس لما برجع ببقي عايزة حد يستناني ...اللي مقدرش يستنى..من حقه يمشي....بس أنا مش هادور غير على اللي استناني...!


طول اليوم مستنية حاجة جميلة قوي تحصل عشان كدة باستخسر أدخل أنام و أخلص اليوم ...و باستني اصحى تاني بكرا...عشان الحاجة الجميلة دي هتيجي...حتى لو أغنية حلوة فكرتني بناس مش هشوفهم تاني..

أو جملة في فيلم خلتني أكلم حد أثر في حياتي ولو للحظة...


بعض الرسائل دي رايحة لبعض الناس إلي مش موجودين في حياتي خلاص

No comments: